أسئلة شائعة حول فيروس سي
_ يا دكتور انا عملت المسح لفيروس سى وطلع ايجابى ياترى أيه الخطوة اللى هنعملها بعد كده ؟؟
هتعمل وظائف كبد كاملة ووظائف كلى وبي سى آر لفيروس سي ودلائل أورام وتحليل الكشف عن فيروس بى وأشعة تلفزيونية على البطن والحوض
__/ بس ده كتير أوى وغالى عليا !!!
ما هو كل حاجة بالمجان فى الحملة دى
__ / طب وبعدين ؟؟
لو ال بى سي آر طلع إيجابى وباقى التحاليل والأشعة كويسة هتصرف علاج للفيروس وطبعا بالمجان
بس بيقولو العلاج شديد وبيهد الجسم !!
عايزين نسيبنا بقى من قالولى دى هما مين دول
العلاج بيكون ثنائى أو ثلاثى حسب تحاليل كل واحد ومفيش أعراض جانبية كتير يعنى مش هتحس بحاجة إن شاء الله ومتسمعشى كلام حد وبالمناسبة مفيش فى العلاج حقن خالص كله أقراص والحمد لله
طيب هو الفيروس لو نشط آخد علاج ولو خامد مفيش علاج؟؟
لأ طبعا الكلام ده معدشى موجود دلوقتى كل اللى عنده الفيروس إيجابى هياخد علاج
هو رقم ال بى سي آر بتاعى كام ؟
بص يا حاج الرقم مش بيفرق معانا خالص يعنى اللى عنده ١٠٠ زى اللى عنده ١٠٠ مليون كله هيتعالج ويخف إن شاء الله فمتشغلشى بالك بالأرقام وريح دماغك
بص يا حاج الرقم مش بيفرق معانا خالص يعنى اللى عنده ١٠٠ زى اللى عنده ١٠٠ مليون كله هيتعالج ويخف إن شاء الله فمتشغلشى بالك بالأرقام وريح دماغك
من ساعة ما عرفت إن عندى الفيروس وكل شوية أفتكر واحد مات بيه وكانت عنيه صفرا وبطنه فيها استسقاء ورجليه متورمة وبزعل
⭐ لازم نفرق بين المريض اللى عنده الفيروس ووظائف الكبد كويسة فده العلاج بيفيده جدا وبيحميه من الوصول للمراحل المتأخرة دى
⭐ وبين المريض اللى عنده خلل شديد فى وظائف الكبد فده حتى لو الفيروس اختفى من عنده الوظائف مش هتتحسن إلا لو زرع كبد جديد
علشان كده لازم ناخد العلاج ونحمى نفسنا لأنه كبد واحد فقط
بس السونار ظهر فيه تليف فى الكبد
نفس الكلام اللى فات
⭐لو التليف موجود والوظائف كويسة فالعلاج هيقلل حدوث المضاعفات وطبعا اللى عنده تليف هيتابع بالكشف باستمرار كل ٦ شهور حتى لو الفيروس اختفى
⭐ أما اللى عنده تليف وخلل شديد فى الوظائف ده اللى حله الوحيد زراعة الكبد
طيب هو الفيروس بيتنقل عن طريق الأكل والشرب واللعاب والعلاقة الزوجية؟
لا . اطمئن خالص الفيروس لا يتنقل إلا عن طريق اختلاط دم المصاب بدم إنسان أخر كنقل الدم أو شكة الإبرة ....
طيب صاحبى عمل أجسام مضادة وطلعت إيجابية وال بى سي آر سلبى !!!
تمام ده ليه اكترمن احتمال
⭐ ممكن يكون كان عنده والجسم قضى عليه بتيسير ربنا لكن الاجسام المضادة هتقعد العمر كله
⭐ أو الفيروس موجود بكمية قليلة جدا ومختفى فى مكان ما فى الجسم غير الدم وممكن يظهر مع مرور الوقت
⭐ أو ان التحليل اللى طلع ايجابى غلط
وعلى كل حال مش هياخد علاج غير لما يظهر فى الدم
هل فيه احتياطات معينة عند أخذ العلاج
طبعا
⭐ تغيير المتعلقات الشخصية زى فرشاة الاسنان وماكينة الحلاقة والقصافة بعد بداية العلاج علشان ممكن تعديك تانى
⭐ ممنوع اخد دوا على الفاضى غير بعض استشارة الطبيب المتخصص
⭐ أصحاب الامراض المزمنة زى السكر والضغط والقلب وغيرها..... لازم يتم مراجعة الادوية اللى بتتاخد علشان ميبقاش فيه تعارض بين الأصناف المختلفة
⭐ لازم نبطل السجاير والشيشة لأنها بتأثر على فاعلية الدوا ففرصة تاخد الموضوع تحدى وتبطل .
⭐ نخفف من الأكلات الدسمة واللى فيها مواد حافظة
⭐ الشهر فى العلاج ٢٨ يوم مش ٣٠ يوم
⭐تظبيط السكر بيزود فاعلية الدواء
من احد اطباء الحملة القومية القضاء على الفيروس
0 التعليقات :
إرسال تعليق