تفاصيل البورد الطبي العسكري المصري

تفاصيل الإعلان والدراسة والتدريب والحضور والرسوم والترقية :

1- بورد الأكاديمية الطبية العسكرية ، شهادة تمنحها الأكاديمية الطبية العسكرية القوات المسلحة

2- الاعلان نازل في تخصصات كتير كلينكال وإدارة مستشفيات

3- السنة دي هي الدفعة الثانية من التخصصات الكلينكال و الدفعة الثالثة من إدارة المستشفيات

4- السنة اللي فاتت كانت أول دفعة في التخصصات الكلينكال الإعلان نزل في آخر 9 والنتيجة والانترفيو كانو في شهر 11 وبدأت الدراسة في شهر 1 أو 2 

 

- السنة دي الميعاد بدري شوية الإعلان نزل في شهر سبعة وكدا احتمال الدراسة تبقي في شهر 11

5- بالنسبة للتخصصات الكلينكال هي .. الجراحة العامة وتخصصاتها ( العظام ، المخ والأعصاب ، التجميل ، الأوعية ، الأطفال ، القلب والصدر ) .. والباطنة وتخصصاتها ( الجهاز الهضمي ، الغدد ، الصدر ، الكلي ) .. والأطفال ، والرعاية المركزة ، والتخدير ..

- بالنسبة للجلدية ؛ تعتبر ضمن تخصصات الباطنة التخصصية .. وهي مش موجودة صراحة في الإعلان بس كانت مفتوحة السنة اللي فاتت وتعتبر تبع تخصصات الباطنة يعني أول سنتين باطنة عامة ( أو ممكن أول سنة بس ، لسه مش عارفين التفاصيل دي )

6- عدد سنوات البورد في أغلب التخصصات 5 سنين .. وبالنسبة لتخصصات الباطنة والجراحة هيكون سنتين في التخصص العام و 3 سنوات في التخصص الدقيق .. شبه الزمالة المصرية كده

7- اللي معاه الدبلومة الحديثة سنتين من الجامعة بتخصم سنة من البورد .. واللي معاه الماستر بيخصم سنتين من البورد في نفس التخصص .. ومفيش معلومة عن الزمالة البريطانية إنها بتخصم أو مش بتخصم مدة من التدريب ..بس قالو بتقدم طلب وهما بيناقشوه

8- بالنسبة للترقية من النقابة لسه طبعا مفيش دفعات اتخرجت بس اكيد هيتم اعتماده يعني سواء من النقابة أو من المجلس الأعلي للجامعات وهيبقي غالبا زي الزمالة المصرية يرقي لدرجة أخصائي يعني تقدر تفتح عيادة وتشتغل برايفت

أما الترقية في وزارة الصحة مش معروف وضعه إيه بس اكيد هيسمحوا بالترقية بيه في الوزارة

9- بالنسبة للتخصصات الكلينكال بيقولوا إنها معتمدة من الكلية الملكية البريطانية وبالنسبة لتخصص إدارة المستشفيات بيقولوا إنها معتمدة من جامعة كارديف بالتعاون مع الأكاديمية البحرية للعلوم والتكنولوجيا والنقل البحري بالأسكندرية

10- التدريب هيبقي في المستشفيات العسكرية زي غمرة العسكري والمعادي وكوبرى القبة والجلاء وحميات ألماظة والحلمية العسكري ...الخ

11- الحضور في تدريب البورد العسكري متوسط من 4 ل 5 أيام أسبوعيا .. يعني متوسط حوالي 48 ساعة موزعين علي أربعة أيام .. وغالبا مش هتعرف تجمعهم في يومين أو 3 أيام للأسف .. والحضور لابد منه لأنه برنامج تدريبي

12- المصاريف للمدنيين اللي اتقال السنة اللي فاتت إنها حوالي من 30 ل 35 ألف جنيه للسنة الواحدة .. تدفع علي قسطين بعد القبول .. وطبعا مفيش مرتب من البورد طول فترة التدريب لأنك مش متعين عندهم ولا منتدب من الصحة

13- التقديم والدراسة لا تشترط موافقة جهة العمل .. هو يعتبر بتقدم بفلوسك .. يعني سواء كنت بتشتغل أو طبيب حر أو بتذاكر حاجة تانية مفيش تعارض

14- التقديم من 10 يوليو 2021 ولمدة شهر ، يوميا من السبت للخميس من 9 ص حتي 3 م .. بمقر الأكاديمية الطبية العسكرية ، في 7 شارع إحسان عبدالقدوس ، متفرع من شارع الخليفة المأمون ، منشية البكري ، القاهرة

15- الورق المطلوب للتقديم .. شهادة التخرج والامتياز والبطاقة سارية وصورتها وشهادة الميلاد أصلية وعدد 8 صور شخصية .. والسيرة الذاتية C.V .. ولو موجود أي شهادات دراسات عليا

16- مطلوب للقبول اجتياز امتحان تويفل TOEFL أو OET .. بس مش مطلوب في التقديم .. يعني ممكن تقدم من غيره ولو اتقبلت تجيب شهادة التويفل خلال أول سنة عادي

17- رسوم التقديم 200 جنيه (ده اللي حصل السنة اللي فاتت) .. ولو قبلت بيكلموك وتكمل ورقك بيضيفوا الناس علي جروب واتساب و بيحددوا مواعيد للانترفيو لكل تخصص

18- الأولوية في القبول للحاصلين علي شهادات دراسات عليا .. يعني الماستر أولي من الدبلومة .. والدبلومة أولي من البكالوريوس

19- البورد العسكري مش هيديك إجازة تفرغ للدراسة من الشغل الحكومي ولا تفرغ للامتحانات .. ولا هيعفيك من التكليف .. ولا هتعمل انتداب من الصحة .. وهو يعتبر دراسة خاصة علي حسابك الشخصي .. أنت بتحاول توفق ما بينها وما بين شغلك في الصحة ولو مقدرتش تحضر أو تمتحن بتضيع عليك السنة .. وواقعيا اعتقد إنه مناسب أكتر للطبيب الحر وللناس القديمة في الصحة اللي بتحضر أيام قليلة وعندها وقت مثلا

20- بالنسب للملتحقين بالزمالة المصرية خصوصا الدفعات الجديدة (زميل مكلف) المفروض إن أي حد ملتحق بالزمالة ده بيمنع دراسة أي شهادة أخري مع الزمالة وبتمضي إقرار علي الكلام ده وأنتت بتستلم .. لكن الممارس العام مفيش تعارض إن شاء الله بس أهم حاجة يقدر يوفق الحضور بين الشغل الحكومي وتدريب البورد

21- محدش عارف علاقة البورد العسكري بتكليف الجهات الخارجية ( تكليف الجيش ) ..

- معروف إن اللي جاله زمالة بيروح تكليف الجيش علي التخصص اللي جاله في الزمالة فهل هيعرف يلتحق بالبورد العسكري و هو هناك ؟ .. غالبا لأ لأنه ملتحق بالزمالة

- أما اللي جاله ممارس عام وراح تكليف الجيش .. وقدم والتحق بالبورد فمفيش تعارض إن شاء الله .. بس الفكرة محدش عارف هيبقى وضعه إيه لما يرجع الصحة بعد سنتين تكليف الجيش ما يخلصوا وساعتها هل هيعرف يوفق ف الحضور في البورد العسكري ولا مش هيعرف .. ولا هيضطر يستقيل ساعتها من الصحة عشان يكمل تدريب البورد

22- يعني الخلاصة في دفعات النظام الجديد للتكليف ..

- الزميل المكلف غالبا مش هيعرف يوفق بين الزمالة المصرية والبورد العسكري

- أما الممارس العام .. ينفع يقدم علي البورد لو عرف يوفق الحضور .. يعني مثلا لو بيحضر يومين ف الحكومي بس وباقي الأسبوع فاضي ويقدر يوفق بين التكليف والبورد

- أما تكليف الجيش .. المفروض إنه ينفع يقدم .. بس لما يرجع الصحة .. لو عايز زمالة غالبا مش هيعرف يوفق بين الاثنين .. أما لو مش عايز زمالة يبقا ممكن يوفق الحضور أو يستقيل من الصحة ساعتها بعد ما يخلص سنتين تكليف الجيش

23- كل الكلام دا لسه ملامح رئيسية .. وأنا حاليا معرفش تفاصيل أكتر من كدا .. واكيد كل التفاصيل الرسمية هتنزل قريب من عندهم.

 

 

 

Share on Google Plus

About Dr. Ammar Khalil

د.عمار خليل : أخصائي أمراض الباطنة العامة ( ماجستير القصر العيني ) وعضو الجمعية المصرية للتعليم الطبي المستمر والجمعية المصرية للسكر ودهنيات الدم، نتابع أمراض الكبد والجهاز الهضمي ، أمراض القلب وضغط الدم