البورد العربي جامعة المنصورة فتح للتقديم من 15 يناير 2022
1- يعني ايه بورد عربي؟
دي شهادة تمنح من المجلس العربي للاختصاصات الصحية
مين المجلس ده؟
ده تابع لمجلس وزراء الصحة العرب التابع لجامعة الدول العربية
و مفروض مجلس وزراء الصحة العرب ده يشمل كل وزراء الصحة بكل الدول العربية 
و لذلك المجلس العربي بكل تشكيله و الادارات جواه فيها اعضاء من كل الدول العربية
2- هل البورد العربي ده حاجة جديدة؟
لا طبعا
المجلس العربي تم تأسيسه عام 1978 و تم منح اول شهادة بورد عربي عام 1984 ، و ده بالمناسبة تاريخ قبل انشاء بعض كليات الطب الحالية اللي بتدي شهادات ماجستير و دكتوراة
هو بس يمكن علشان الكلام كتر عليه مؤخرا في مصر فبعض الناس تخيلوا انه حاجة جديدة
3- مقره فين؟
المقر الرئيسي في سوريا و فيه فرع مؤقت في الاردن و فيه مكتب اتصال في مصر و السودان
بالنسبة للاعتراف بالشهادة :
4- هو معترف بيه تقريبا في كل الدول العربية
بالنسبة لدول الخليج
السعودية و البحرين الزمالة المصرية تعتبر اعلي في التصنيف (حتي الان) طبعا المقصود هنا البورد العربي من خارج السعودية لان اللي من داخل السعودية بيبقي تصنيفه اعلي
باقي دول الخليج اما انه اعلي من الزمالة المصرية او زيها
5- بالنسبة لمصر :
علشان النقطة دي فيها لغط كتير
البورد العربي في مصر هو معادل للزمالة المصرية ، يعني انت لما بتخلص البورد العربي بتروح مقر الزمالة و تاخد افادة ان الشهادة اللي معاك البورد العربي معادلة للزمالة المصرية و ليك كافة الحقوق و المزايا التي تمنح لحامل شهادة الزمالة المصرية
6- بالنسبة لترقية النقابة :
انت بتروح بالمعادلة و ساعتها هيعاملك كأنك معاك زمالة مصرية بنفس تصنيفها وقتها بقي ، هي دلوقتي بتصنف اخصائي و بعد اربع سنين ترقي استشاري ، يبقي انت هتاخد نفس التصنيف بالضبط
يبقي انت مش بتروح بشهادة البورد بس لا انت بتروح بشهادة البورد و المعادلة لان من غير المعادلة هو ميعرفش عنك حاجة
طبعا لو اخدت شهادة اخصائي من النقابة تقدر تفتح عيادة و تشتغل برايفت عادي
7- بالنسبة لترقية الوزارة :
نفس القصة برضو هتروح الزمالة و تجيب افادة المعادلة بالزمالة المصرية و هتتعامل زي اللي معاه زمالة مصرية بالضبط في الترقيات ، و من غير المعادلة هو ميعرفش عنك حاجة
بس ما بعد كده الموضوع فيه اختلافات شوية
8- لو انت من المكلفين بالنظام القديم دفعة 2017 تكليف مارس 2019 و ما قبلها :
أ- لو جالك نيابة في نفس التخصص يبقي ينفع ترقي اخصائي بالمستشفيات (العلاجي) بعد الحصول علي البورد العربي اللي هو بين قوسين معادل للزمالة المصرية
ب- لو انت نيابة في تخصص مختلف يبقي هيحصل مشكلة و الله اعلم هيرضوا يرقوا و لا لا
ج- اما لو مجلكش نيابة اصلا و انت مازلت تكليف ممارس عام يعني في الريف يبقي ممكن ترقي اخصائي بالوحدات الصحية (الرعاية الاساسية) ، و بعد ما ترقي بالوحدات الصحية ممكن تطلب النقل للمستشفيات (العلاجي)
9- لو انت من المكلفين بالنظام الجديد دفعة تكليف سبتمبر 2019 و ما بعدها :
مفروض مفيش نيابات و لا ماستر في النظام ده و كله هيبقي زمالة و طبعا البورد العربي هو معادل للزمالة المصرية
طيب هل كده هينفع ترقي بيه في الوزارة طالما زيه زي الزمالة؟
للاسف مفيش كلام نهائي و اخير في النقطة دي لان مفيش و لا دفعة لسه خلصت زمالة علي النظام ده و راحوا يرقوا علشان نعرف هل هيترقوا بنفس القواعد السابقة و لا لا
لكن اعتمادا علي القواعد السابقة نقدر نقول
10- لو انت ممارس عام ، هنا فيه حاجة ان اول دفعتين اللي هم 2018 و 2019 دول كانوا اغلبهم ممارس عام علي العلاجي (المستشفيات يعني) و ان كان فيه جزء منهم راح الوحدات الصحية و كمان الدفعات اللي جاية لسه مش معروف هيبقوا ممارس عام في العلاجي و لا الرعاية الاساسية
طيب ده يفرق في ايه؟
انه لو ممارس عام في الرعاية الاساسية يبقي ممكن يبقي زيه زي النقطة اللي فاتت رقم 8 - ج و يرقي في الرعاية الاساسية و بعدها يبقي ينقل للعلاجي
و هنا ممكن حد يقول ان اللي جالهم زمالة في النظام الجديد كلهم اتكلفوا علي رعاية اساسية و اخلوا منها للزمالة طيب ما اللي واخد بورد و عادلوا بالزمالة كده ايه الفرق ؟ ان ده جاله اسم التخصص في الصحة و ده مجالوش تخصص اصلا؟
فمن هنا ممكن اللي واخد بورد يطلب انه يترقي مباشرة في العلاجي و هو و حظه بقي وقتها هيمشوها ازاي
انما لو ممارس عام في العلاجي هل هيطلبوا انه يكون جاله نفس التخصص في الصحة و لا لا زي ما بيحصل مع الممارس العام اللي بيقعد سنة و بعدين يجيله زمالة؟ الله اعلم
لو نفترض مطلبوش يبقي خلاص هيرقي مباشرة بتخصص البورد و هيبقي في المستشفيات
اما لو طلبوا طيب ما هو ممكن يطلب النقل للرعاية الاساسية و يبقي زيه زي اللي فوق كده
فزي ما انت شايف الموضوع معقد شوية و فيه تداخلات كتير
11- طيب لو زمالة
هنا بقي لو انت نفس التخصص انا شايف ان ملهاش لازمة اصلا ان تروح تاخد بورد في تخصص انت كده كده فيه زمالة مصرية لكن لو نفترض عملت كده هو مش هيضيف لك شئ داخل مصر لانك بالفعل معاك زمالة و هو معادل للزمالة المصرية اصلا ؛ ده فضلا علي ان اللي مسجل زمالة بيبقي ليه انه يسجل تسجيل مزدوج بورد عربي
اما لو انت زمالة مش نفس التخصص هو مفروض اصلا انت ماضي اقرار انك متسجلش شهادة اخري جنب الزمالة بس يعني لو نفترض عدت هنا هتبقي مشكلة لان تخصصك في الوزارة مختلف و هتبقي زي رقم 8 - ب و الله اعلم هيرضوا يرقوا و لا لا
طيب خلصنا قصة الترقية
12- الشهادة عبارة عن ايه ؟
عبارة عن تدريب + امتحانات
زي الزمالة كده
بتتدرب عدد سنوات معين علي حسب كل تخصص و بتمتحن امتحانات
بالنسبة للامتحانات
هو صراحة امتحانات البورد العربي الكل يشهد انه من اصعب الامتحانات و كمان السورسات قليلة و مفيش خبرات كتير متوافرة عن الامتحانات
بس ده نظامها عموما
13- الفرست :
- ده غالبا بعد 9 او 10 شهور او سنة من بداية التدريب علي حسب كل تخصص
- بيتعمل مرتين في السنة مرة في ابريل او مايو و المرة التانية في اكتوبر او نوفمبر
- و بيبقي الـ MCQ علي جهاز كمبيوتر و بيتعمل في مصر عادي
- و لازم تكون داخل الفرست قبل ما يعدي سنتين من بداية التدريب
- و معاك اربع فرص للفرست
14- السكند :
- ده بعد نهاية التدريب خالص في الاخر
- بيتعمل مرة واحدة في السنة في اكتوبر او نوفمبر
- و بيبقي الـ MCQ علي جهاز كمبيوتر و بيتعمل في مصر عادي
- و لازم تكون داخل السكند قبل ما يعدي سنتين بعد نهاية فترة التدريب
- و معاك اربع فرص للسكند و لو موفقتش ممكن يبقي ليك فرصتين كمان خلال سنتين بشرط انك تعيد اخر سنة تدريبية
15- الثيرد :
- بعد النجاح في السكند
- ممكن يتعمل مرة او مرتين في السنة
- بيبقي كلينكال و/او شفوي و/او حالات و ممكن يبقي في اي دولة عربية يعني مش شرط يبقي في مصر
- و لازم تكون داخل الثيرد قبل ما يعدي سنتين علي النجاح في السكند
- و معاك اربع فرص للثيرد خلال اربع سنوات و لو موفقتش ممكن تعيد السكند تاني و بعدها يبقي ليك فرصتين كمان للثيرد خلال سنتين
16- بيبقي فيه تقييم سنوي و لازم تجتازه علشان تنتقل من سنة للسنة اللي بعدها
هو بيبقي غالبا حاجة بسيطة و كله بيعدي تقريبا
17- طيب بالنسبة لقواعد التجميد؟
- ليك بحد اقصي سنة طوال مدة التدريب و يكون بعذر مقبول
- الحامل ليها مدة لا تزيد عن 3 شهور
- التجنيد علي حسب مدته
و كده كده اي فترة هتجمدها هتعوضعها كده كده
18- التخصصات المتاحة في البورد العربي
تقريبا معظم التخصصات متاحة بس اغلب الباطنات للاسف مش موجودة
و بالمناسبة مؤخرا استحدثوا تخصص الرعاية المركزة و جراحة الاورام بس لسه هنشوف شروطهم ايه هل هيقبلوا بالبكالوريوس و لا لازم قبلهم شهادة تخصص جنرال
طيب علشان تدخل البورد العربي في مصر
19- في مصر عندك مدخلين للبورد العربي ، يعني نفس الشهادة بكل تفاصيلها بس الفكرة انت بتدرب فين
عندك الزمالة المصرية
و عندك جامعة المنصورة
20- بالنسبة للزمالة المصرية :
لو انت متدرب بالزمالة المصرية ممكن تعمل تسجيل مزدوج للبورد العربي بنفس التخصص و بنفس الاماكن اللي بتدرب فيها في الزمالة ، الفرق بس انك بتمتحن امتحانات البورد الي جانب امتحانات الزمالة
ده اعلان كان بينزل كل سنة بس السنة دي اتأخر شوية لاسباب كتير لكن هم قالوا قريبا هينزل الله اعلم امتي
لما ينزل ان شاء الله هنشوف الشروط وقتها و الاماكن المعتمدة وقتها و نتكلم عنه ان شاء الله
21- اما بالنسبة للبورد العربي جامعة المنصورة :
ده بروتوكول تم توقيعه تقريبا في اواخر 2016 و ابتدي العمل بيه في 2017
ملخصه انك بتدرب في مستشفيات جامعة المنصورة و بتمتحن تبع البورد العربي
و بتدفع رسوم للمنصورة و بتدفع رسوم للبورد
و في النهاية بتاخد شهادة البورد العربي
22- طيب هل فيه علاقة ما بين التسجيل في البورد العربي جامعة المنصورة و ما بين التسجيل في البورد العربي تبع الزمالة؟
لا
كل جهة من دول منفصلة عن التانية
هو اه البورد العربي شهادة واحدة بس هو ليه بروتوكول مختلف مع كل جهة من دول
يعني لو مسجل تبع الزمالة ليك خصم 75% علي رسوم البورد و هتدرب في مستشفيات الزمالة بنظام الروتيشين بتاع الزمالة
انما لو مسجل تبع جامعة المنصورة فانت هتدفع رسوم للبورد و رسوم لجامعة المنصورة و مفيش خصم و هتدرب في جامعة المنصورة بس
لكن في النهاية سواء كده او كده اللي هيمتحنك هو البورد و اللي هيديك الشهادة هو البورد
23- بالنسبة للرسوم :
انت بتدفع رسوم لجامعة المنصورة و بتدفع رسوم للبورد
رسوم جامعة المنصورة هتلاقيها في اللينك ده و في الصور هنا
بالنسبة للمصريين تتراوح ما بين 20 الف - 30 الف جنية مصري في السنة علي حسب التخصص
بالنسبة للوافدين بتبقي اكتر من كده و بالدولار
اما مصاريف البورد
دي بتدفع رسم عند التسجيل اول مرة - رسم تدريب كل سنة و رسم المجلة - رسم الامتحانات
في الغالب يعني علي مدار سنين البورد الموضوع بيترواح ما بين الفين - الفين و نص دولار تقريبا لو مدة التدريب ما بين اربع و خمس سنوات
و دول بتدفعهم علي مدار سنوات التدريب مش مرة واحدة
يعني الخلاصة لو تخصص اربع سنين ممكن تدفع اجمالا كده شاكب راكب كده بتاع 150 الف جنية مصري لو نجحت من اول مرة في الامتحانات
24- طيب ينفع اي حد يقدم فيه ؟
ايوة
ادخل هنا شوف اللينك ده فيه كل التخصصات المتاحة و الشروط و المصروفات
23- طيب بالنسبة لوضعي في الصحة؟
هم في الادوار اللي فاتت مكنوش بيطلبوا موافقة جهة العمل و لا بيحتاجوا منك حاجة ، بس لسه حد قايلي انهم الدور ده طالبين موافقة جهة العمل او طبيب حر ده قسم الجلدية تحديدا ، مش عارف باقي الاقسام ايه نظامها
24- لو نفترض ان الوضع كما هو عليه في الادوار اللي فاتت كده ممكن تروح تقدم و تتدرب من غير ما جهتك الاصلية تعرف عنك حاجة و مش هتفرق انت نظام جديد و لا قديم بس طبعا علشان تعرف توفق ما بينهم لازم تكون قريب من المنصورة لان الحضور في البورد كتير
و طبعا لو انت زمالة فانت ماضي اقرار انك مش هتسجل شهادة اخري ، فكده انت بتخالف الاقرار علي مسئوليتك
لو الدنيا مشيت تمام و خلصت بورد يبقي نظام الترقية زي ما قلت في رقم 5 و ما بعدها
25 - اما لو نفترض انهم طلبوا موافقة جهة العمل و طلع الكلام صح كده يبقي انت لازم تقدم طلب في جهة عملك الاصلية علي التدريب في البورد العربي مستشفيات جامعة المنصورة
طبعا كده هيبقي الموضوع اصعب لان هل هم هيوافقوا علي انتداب؟ و لو وافقوا علي انتداب هيبقي انهي نوع هل كلي و لا جزئي و ايفاد للتدريب و لا خارج ساعات العمل ؟
و هنا بقي الوضع هيختلف
26- لو انت من المكلفين بالنظام القديم دفعة 2017 تكليف مارس 2019 و ما قبلها :
- لو انت في نيابة يعني منتدب من جهتك الاصلية لمكان النيابة هتجيب الموفقة من مين من الجهة الاصلية و لا جهة الانتداب؟ و لو جبتها من جهتك الاصلية (المديرية او الادارة) انتداب هل هتخلي و تسيب النيابة و تروح تستلم هناك لان مينفعش انتداب علي انتداب ، و كده هيبقي القبض منين لان المنصورة مش هتقبضك
- لو مش في نيابة و لسه تكليف هل هيرضوا يخلوا لك و تروح هناك ؟ و كده هتقبض منين ؟
- طيب لو ده كله منفعش هل ممكن تاخد اجازة بدون مرتب ؟ للاسف مش بيتوافق بسهولة عليها دلوقتي
هو سواءا كده او كده طبعا لو عرفت تاخد موافقة علي الانتداب و خصوصا الايفاد للتدريب يبقي كده ده احسن حل هتبقي اخليت من الصحة و بتدرب في المنصورة و بتاخد جواب انتظام كل شهر تقبض بيه بس طبعا دي صعب جدا حد يوافقك لك عليها
27- لو انت من المكلفين بالنظام الجديد دفعة تكليف سبتمبر 2019 و ما بعدها :
- لو انت ممارس عام هتجيب موافقة منين؟ من المديرية و لا الادارة و لا المستشفي؟
طيب لو ده كله منفعش هل ممكن تاخد اجازة بدون مرتب ؟ للاسف مش بيتوافق بسهولة عليها دلوقتي
طبعا لو عرفت تاخد موافقة علي الانتداب و خصوصا الايفاد للتدريب يبقي كده ده احسن حل هتبقي اخليت من الصحة و بتدرب في المنصورة و بتاخد جواب انتظام كل شهر تقبض بيه بس طبعا دي صعب جدا حد يوافقك لك عليها
- اما لو انت زمالة فانت ماضي اقرار انك مش هتسجل شهادة اخري ، فكده انت بتخالف الاقرار علي مسئوليتك
بس الفكرة هل حد هيرضي يديك موافقة و انت زمالة ؟ و لو اخدت موافقة علي انتداب فانت اصلا في الزمالة منتدب ازاي هتنفذ انتداب علي انتداب؟
صراحة انا شايف انهم لو فعلا طلعوا بيطلبوا موافقة جهة العمل كده بقي الموضوع اصعب من قبل كده خصوصا لو انت زمالة
28- مواعيده :
بيفتح للتسجيل في شهر 7 و 8 و التدريب يبدأ اول اكتوبر
و بيفتح للتسجيل تاني في شهر يناير و فبراير زي دلوقتي كده و التدريب يبدأ اول ابريل
خطوات التقديم :
29- بتروح للقسم اللي عايز تسجل فيه بمستشفيات جامعة المنصورة و تسألهم علي شروطهم و لو تمام هتملي طلب من عندهم كده موجه لرئيس القسم
و ابقي خد معاك كل شهاداتك التخرج - الامتياز - التقديرات ...الخ
و بعدين تابع معاهم بقي لما يردوا علي الطلب سواء بالموافقة او الرفض
و لسه حد قايلي انهم الدور ده طالبين موافقة جهة العمل او طبيب حر ده قسم الجلدية تحديدا ، مش عارف باقي الاقسام ايه نظامها
فدي هتبقي حاجة اضافية لازم تجيبها
30- لو تمت الموافقة يبقي هتديك استمارة التسجيل
هي عبارة عن 4 ورقات ، اول ورقة تعليمات ، و تاني و تالت ورقة كلها بيانات تخصك هتملاهم انت ، اما رابع ورقة هتسيبها فاضية هم هيخلصوها تتمضي و تتختم من عندهم
31- بعد كده هتاخد منهم
- استمارة التسجيل ممضية و مختومة
- و كمان تاخد منهم خطاب انك اتقبلت للتسجيل في البورد العربي عندهم قسم كذا و تاريخ بدء تدريبك كذا و يكون ممضي و مختوم
و هتضيف عليهم انت
- اصل شهادة التخرج موثقة من الخارجية
- اصل شهادة الامتياز موثقة من الخارجية
- جواز السفر
- 4 صور شخصية ملونة
- ايصال دفع 100 دولار علي حساب المجلس العربي للاختصاصات الصحية
بنك مصر
اسم الحساب: المجلس العربي للاختصاصات الصحية
Swift Code:
BMISEGCX140
BANQUE MISR
Account Number: 1910120000008346
32- هتاخد كل الورق ده سكانر و تعمله PDF و تبعته علي ايميل مكتب البورد بالقاهرة
ده الايميل
manager.cairo.office@arab-board.org
و لو اتأخروا في الرد ابقي اتصل علي الرقم ده
01212896606
33- لما يرودوا عليك انه تمام هنا بقي مفروض تسلم اصول الورق يا اما تبعتهم بريد يا اما تروح بنفسك
لو هتروح بنفسك هناك المكتب يبقي ايام الاثنين - الثلاثاء - الاربعاء فقط
و تبقي مجهز كل الورق في حافظة بلاستيك معاك و هتراجعهم و تقولك تمام روح استلم
العنوان :
أكاديمية الاميرة فاطمة للتعليم الطبي
هتركب اي حاجة من رمسيس رايحة نادي السكة و تنزل محطة المهمات قبل مطلع الكوبري و بعدين تعدي الطريق و تتمشي خمس دقايق هتلاقيها علي شمالك
او تركب مترو و تنزل محطة ارض المعارض بس هتضطر تاخد تاكس لان المسافة مشي كتير بتاع تلت ساعة
34- اما لو هتبعتهم عن طريق البريد السريع ، هتجمع الورق في ظرف كبير و هتبعته علي العنوان ده و تبقي كاتب العنوان بوضوح علي الظرف من بره
المعهد القومي لتدريب الاطباء بالعباسية الكائن في شارع ممدوح سالم - مدينة نصر بجوار بوابة /2/ أرض المعارض - مكتب البورد العربي - السيد أ.د/ منير محمد منصور - مدير مكتب المجلس العربي للاختصاصات الصحية بالقاهرة
و تستني كام يوم لما يوصلهم و هترد عليك علي الايميل انك تروح تستلم
35- لما البورد يردوا عليك انك تروح تستلم ، بعد كده هتروح بقي للمنصورة علشان تدفع الرسوم ، هتديك اذن دفع هتمضيه من مسئول البورد و بعدين تروح الخزنة تدفع
بعد كده هتروح لمبني كلية الطب مش المستشفي هتطلع الدور التالت عند مدام منار العلاقات الثقافية هتديك ورقة صفراء كده هتمضيها من العميد و بعدين ترجع المستشفي هتسلمهم صور كل الورق اللي معاك و هيعملوا لك استلام عمل و كده مبروك انت استلمت
36- كده مطلوب منك بقي تتابع مواعيد الامتحان
هتتابع الموقع ده هتلاقي عليه اعلانات كل شوية بتواريخ الامتحانات
و تدفع كل سنة رسوم البورد علي حساب البورد في بنك مصر
و كمان رسوم جامعة المنصورة
]. LPL] UGN د. محمد على عارف
0 التعليقات :
إرسال تعليق