موضوع نتكلم فيه على جنب شوية
فيه مضاد حيوي اسمه
#Averozolid
المادة الفعالة فيه هي Linezolid لينيزوليد
موجود منها شكلين دوائين،
الأول أقراص بتركيز 600 مجم
الثاني شراب بتركيز 100 مجم / 5 مل
...
#علشان محدش يقول اني ضد شركة ما
المادة الفعالة نفسها موجودة في
Debacozolin ديباكوزولين
Bactizolid باكتيزوليد
Elixozolid اليكسوزوليد
Jadozolid جادوزوليد
Oxazolid اوكسازوليد
Respenzo ريسبنزو
Linezox لينيزوكس
Vilzolid فيلزوليد
Strainoliz ستراينوليز
و كل دول ينطبق عليهم الكلام الي تحت ده
...
المهم حالياً الدواء ده بقا كثير من الدكاترة يلاحظوا أنه بيتكتب في أغلب الأطفال، في اوقات بيتكتب علشان شوية رشح او احتقان في الانف او كحة في عيل عمره ايام او أسابيع
...
ببساطة، المادة الفعالة هنا في الادوية دي كلها هي اللينزوليد
#Linezolid
و المادة دي مضاد حيوي أكتشفناه سنة 2000، يعني من حوالي 20 سنة بس، و اتوافق على شكله التجاري في سنة 2001
و عالمياً بدء استخدامه سنة 2004!
...
ايه قصته
المضاد الحيوي ده اخترعناه بعد ما ظهر بكتريا مقاومة لأقوي مضاد حيوي عندنا، مضاد حيوي مش بيستخدم الا في حالات الالتهاب الرئوي الشديد او العدوي الشديدة الي وصلت صاحبها انه يبقى محطوط في الرعاية المركزة او محجوز في مستشفى
المضاد الحيوي ده هو الفانكوميسين !
فلما ظهر بكتريا بتقاوم الفانكوميسين، اضطرينا ندور لحد ما طلعنا بمادة اللينزوليد
طب هل كل البكتريا، الي بتقاوم الفانكوميسين بتستجيب لعقار اللينزوليد
للأسف لأ، علشان كدة
...
ده خلى كل الكتب الطبية و كل الهيئات البحثية و العلمية تعتبر اللينزوليد من اخر الخطوط العلاجية في علاج العدوى
...
يعني لما يبقى خلاص وصلت العيان ل عدوي عنيفة لدرجة ان الفانكوميسين او الي في مستواه مش جايب نتيجة، و نتيجة عمل المزرعة طلعت ايجابية للينزوليد
...
حالياً برة، اللينزوليد متاح في صورة فيال، حقن وريدية اسمها Zyvox، تمنها برة للحقنة حوالي 600 دولار، مش علشان يشلوا الدكاترة ولا الشركات تكسب، لكن علشان الدكتور يفكر الف مرة قبل ما يكتب دواء هيكلف العيان في يومين، مرتبه الشهري !
بالبلدي، علشان حتى لو الشيطان وزك، الفلوس تلسعك
...
علشان نعرف اهمية المضاد الحيوي ده
فاحنا عندنا المضادات الحيوية الي بنستخدمها في عدوى الانسجة الرخوة، زي الجروح او التهاب الحلق
ترتيبها كدة
1) بنسلينات » دي زي الاموكسيل و الايموكس
2) بنسلينات مقاومة للتكسير » دي زي الفلوموكس
3) السبورينات» دي زي الفيلوسيف و الكيبروركس
4) بنلسينات مع مادة مضادة لمقاومة البكتريا » دي زي الاوجمنتين او اليونكتام
5) مضادات حيوية حلقية من نوع بيتا لاكتام » دي زي ميرونام
6) الفانكوميسين
7) اللينزوليد » ده الي هو موضوع البوست ده
8) الكوليستين
و بعد كدة، ايوة بتاخد المريض و تركنه جنب الحيط، لان معندكش اي مضاد حيوي موجود حاليا فوق الكوليستين
و بالمناسبة الكوليستين ده مصيبة، مش بس مش متاح في مصر و هنجيبه أستيراد، لأ ده بيخش يبهدل الكبد و الكلى معاه، و ممكن يدمر نخاع العظام
فالبلدي، انا داخل احرق المكان على الي فيه، و بدعي ان الجسم يقدر بعد انتهاء العدوي انه يرجع يبنى نفسه تاني
...
تخيل بقا يا مؤمن، الدكتور الي بيكتب اللينيزوليد ده عمال على بطال ، عمل فيك ايه
خد اول 7 خطوط دفاعية ليك، رماهم في الزبالة
...
هتقول ما ده حلو، بدل ما اجرب كذا نوع ، ما هو بيجيب من الآخر
اقولك غلط
حضرتك، مع الوقت، البكتريا هتقاوم اللينزوليد طب مع الوقت ده الي هو كم سنة
احب اقولك ان البكتريا بتتكاثر كل 2 الى 3 ايام ، يعني في خلال سنتين او ثلاثة بالكثير، هيبقى النوع المقاوم لكل المضادات الحيوية ده هو الأساس
هتلاقي عيل عنده التهاب في اللوز او حتى شكة في رجله، و أحنا مش عندنا اي مضاد حيوي الطفل بيستجيب له
ليه علشان فيه دكتور كتب له مادة اللينزوليد دي علشان الولد كان عنده دور برد او احتقان في زوره
...
#تعديل لان ناس كتيرة بتشير البوست ده
أولا انا مش بهاجم شركة معينة او مادة دوائية معينة
ولا يعنيني الاسم التجاري
ثانياً و ده الاهم
فيه حالات احنا بنحتاج ندي فيها مادة اللينزوليد Linezolid
برة التقنين بتاعها
الي هو انك لازم تعمل مزرعة (لانه Reserve Antibiotics ) واحد من الدفاعات الاخيرة!
هنا
⬅️ ممكن مريض عنده ارتفاع حاد في السكر و معاه التهاب خلوي واخد جزء كبير من القدم و ممكن يقلب بغرغرينا، ساعتها اطباء الجراحة هيبدأ يديه مادة اللينزوليد من غير مزرعة، لان المزرعة هتاخد وقت و الحالة هتتفاقم
⬅️ مريض كبير في السن و عنده التهاب رئوي و مش بيخف على برتوكول (السبيرونات الحلقية + الماكروليد) ممكن ابدل الماكروليدز بمادة لينزوليد، خاصة و اني بتكلم على مريض أصلاً المفترض انه محجوز في مستشفى
،⬅️ واحد عمل عملية و حصل التهاب صديدي و تقيح في الجرح وصل الى الانسجة الداخلية و قرب ياكل العضلات
ساعتها برده هبدأ بمادة لينزوليد! مش هبدأ السلم من اوله
⬅️ واحد عنده عدوى قد تسبب حدوث تسمم دموي، برده هياخد مادة اللينزوليد
الي هي حالات العدوى الشديدة
انا نفسي كتبته مرتين
بس في حالات عارف اني مضطر لاستخدامه!
...
في الأساس البوست متوجه
تحذير للأطباء بشكل خاص و العاملين في المجال الطبي بشكل عام
انك حاول تبعد عن مادة Linezolid على قدر الإمكان
...
اكتر حاجة خليتني اكتب البوست و اعيد نشره تاني
اني لقيت بعض الصيدليات بتطلع اقراص مادتها الفعالة لينزوليد
ك مجموعة برد
يعني كنا بنعترض على الفلوموكس و الفيلوسيف
حالياً شالوا الاتنين و حطوا اللينزوليد 💥💣
...
معلومة أخيرة
بعد الاطباء الصغار
بيكتب ادوية اللينزوليد شراب خاصة و ان تمن العبوة مش مكمل 35 جنيه بتاريخ نوفمبر 2022
في حين ان ارخص مضاد حيوي من عائلة الاوجمنتين بنفس التركيز تقريباً تمنه 48 جنيه
مش معنى انه أرخص، انك تكتبه رايح جاي
...
بالنسبة لأي حد خد مادة اللينزوليد في اي شكل دوائي
من الحاجات الي بتخلي كتير من الاطباء يكتبوها عمال على بطال
ان المادة دي مضاد حيوي مصنع بالكامل
و بالتالي الاعراض الجانبية منه اقل بكتير
نسبة الحساسية اقل بكتير
التأثير على الاعضاء الداخلية اقل بكتير
و يكاد يكون الحاجة الوحيدة الي ممنوع يتاخد فيها هي مرضى الفشل الكبدي في مراحله الاخيرة (لانه بيتم تكسيره و خروجه من الجسم عن طريق الكبد بنسبة 70%)
وفقا لمصدره
0 التعليقات :
إرسال تعليق